Dearvvasvuođadálu bálvalusaid várás leat viggan ohcat ovttasbarggus Eanodaga gielddain eará doaibmasajiid. Molssaeavttut leat čielggaduvvon viidát, muhto dađi bahábut Gárasavvonis eai leat dán rádjái gávdnon doaimmaide heivvolaš gaskaboddosaš sajit. Heivvolaš doaibmasajiid ohcat ain aktiivvalaččat.
Nuppástusat bálvalusaid oažžumii juovlamánu rájes
Skábmamánus Gárasavvona dearvvasvuođadálus lágiduvvo doavttir-divššárvuostáválddáhat disdaga 17.11. nugo maiddái divššárvuostáválddáhat disdaga 24.11. Goappaš beivviid leat oažžun láhkai maiddái laboratoria- ja boahkohanbálvalusat. Juovlamánus eai leat Gárasavvonis dearvvasvuođadállobálvalusat. Heahtá dearvvašvuođadállu bálvala dábálaččat.
Ohppiidfuolahusa kuráhtor- ja psykologabálvalusat joatkašuvvet Gárasavvonis nugo ovdalge. Baicce etniid- ja mánáidrávvehaga ja maiddái skuvladearvvasvuođafuolahusa bálvalusaid oažžu juovlamánus Heahtá dearvvasvuođadálus.
Veajuiduhttinbálvalusat joatkašuvvet Gárasavvonis nugo ovdalge jagi loahpa rádjái.
Mielladearvvasvuođa- ja sorjjasvuođabálvalusat čađahuvvojit áššehasa dikšunplána mielde gáiddusvuostáválddáhagas, pasieantagalledemiin dahje Heahtá dearvvasvuođadálus.
Jus bálvalusa geavaheapmi gáibida mátkkošteami Heahttái iežas biillain dahje táksiin, mátkki ovddas sáhttá ohcat Kela-buhtadusa Kela rávvagiid mielde.
Bargu gávdnan dihte doaibmasajiid joatkašuvvá
Viggamuššan lea sihkkarastit Gárasavvona guovllu bálvalusaid maiddái boahttevuođas.
– Buresveadjinguovlu ohcá ovttas Eanodaga gielddain gaskaboddosaš sajiid, mat dahket vejolažžan lágidit bálvalusaid Gárasavvonis ovdal go ođđa máŋggadoaimmadállu gárvána čakčat 2027, muitala jođiheaddji divššár Johanna Tervala Lappi buresveadjinguovllu dearvvasvuođadállobálvalusain.
– Dilli lea unohas ja mii ipmirdit ahte dat mielddisbuktá fuola Gárasavvona guovllu ássiide ja bálvalusaid geavaheaddjiide. Guovllu sosiála- ja dearvvasvuođabálvalusaid sihkkarastin lea sihke Lappi buresveadjinguvlui ja Eanodaga gildii dehálaš, Tervala joatká.
Lappi buresveadjinguovlu ja Eanodaga gielda barget nana ovttasbarggu čoavdin dihte dili. Viggamuššan lea gávdnat dorvvolaš ja doaimmaide heivvolaš sajiid nu johtilit go vejolaš ja maiddái sihkkarastit bálvalusaid joatkevašvuođa Gárasavvona guovllus.
Dili ovdáneami, bálvalusaid lágideami ja doaibmasajiid vejolaš ođđa čovdosiid birra dieđihuvvo ássiide dakkaviđe, go lassedieđut leat oažžun láhkai.
Lassedieđut
Lappi buresveadjinguovlu
Johanna Tervala, jođiheaddji divššár, johanna.tervala@lapha.fi
Eanodaga gielda